NU GSPP түлектерінің қатысуымен магистрлік диссертацияны дайындау туралы ақпараттық сессия өтті
2022 жылы 31 наурызда NU GSPP түлектерінің қатысуымен магистрлік диссертацияны дайындау туралы бейресми ақпараттық сессия өтті. Көптен күткен оффлайн кездесу барысында NU GSPP студенттері мен түлектері бас қосып, оқу тәжірибесімен бөлісті.
Үздік PAE (MPP бағдарламалары үшін) және үздік магистрлік жоба (MPA бағдарламалары үшін) жеңімпаздары атанған үш түлек өздерінің диссертацияларын қалай қорғағандары туралы баяндап берді. Олар тақырыпты қалай таңдағанын, белгіленген мерзімдерді қалай орындағанын, жетекшілермен қалай қарым-қатынас жасағанын айтып өз тәжірибелерімен бөлісті.
Камила Тұяқбаева (MPA-2020) команда мүшелерін мұқият таңдауға шақырып, әркім белгілі бір бөлікке жауап беретін ұйымшыл топта жұмыс істеу табыстың айтарлықтай үлесін қамтамасыз ете алатынын атап өтті.
Марта Төлебаева (MPP-2019) тақырыпты дұрыс таңдаудың маңыздылығын атап өтті. «Тақырыбыңыз сізді шабыттандыратын болса, жетекшіңіз бұған күмәнмен қараса да, сіз табысқа жете аласыз», – деді ол.
Гүлайым Тынымберген (MPP-2021) нақты зерттеу сұрақтарына шоғырлану үшін жоба тақырыбын тарылтып, нақты нәрселерге назар аудару қажеттігін атап өтті. Ол сондай-ақ жетекшімен дағдылы түрде кездесу өткізудің маңыздылығын атап өтті.
НУ Жоғары мемлекеттік саясат мектебі 2012 жылы құрылған. Он жыл ішінде мектеп үш жүзге жуық түлек шығарды; қазір мұнда 200-ге жуық студент білім алуда.
Мектепте барлық түлектерді, Мектепті, қазіргі студенттерді біріктіріп, олардың бір-бірімен байланысын қолдауға бағытталған Түлектер қауымдастығы бар.
Түлектер қауымдастығының қызметі туралы оның Facebook-тегі NUGSPP Түлектер қауымдастығы парақшасынан біле аласыз.